Хайуандар донъяһында
Просмотров 980
- "Аҡбуҙат"та баҫылған:04-2015
- Рубрика:Авторҙар / Хайуандар илендә
- Исеме:Хайуандар донъяһында
- Автор:Земфира СӘХИПОВА
- Район:
- Ауыл:
- Рәссам:Майя Ҡәйүмова
Земфира СӘХИПОВА
Хайуандар донъяһында
Урман эсендә бәхәс:
Ҡайһы бәшмәк ағыулы?
— Уҡып ҡара, — ти терпе, —
Китаптан ал аҡылды.
Төлкө, төлкө — һары тун.
Тағы хәйлә ҡорҙоңмо?
Әтәс, тауыҡтар яғына
Мороноңдо борҙоңмо?
Һоро бүре көтөүгә
Һарыҡ һайларға килгән.
Ә көтөүсе эттәр уны
Тотоп кәрәген биргән.
Урман хужаһы, тигән
Даның сыҡҡан, арыҫлан.
Исемеңә — есемең:
Күренәһең алыҫтан...
Бәрәс инәһе янында,
— Мә лә мә, тигән була.
Һөтөн эсеп тамаҡ туйғас
Бейеп һикергән була.
Быҙау, быҙау, быҙауҡай,
Бигерәк матурһың ай-һай!
Тояҡтар ныҡлы ҡалай,
Маңлайыңда йондоҙ — Ай!
Хужа әтәс хужа инде:
Ғаиләһен ул ҡайғырта.
Бөртөк кенә ем тапһа ла,
Ҡошсоҡтарын саҡыра.
Инә тауыҡ һис бушамай
Йөн-мамығын таҙарта.
Себештәрен "көрт-көрт” килеп
Ем сүпләргә тарата.
Күркә күркәлеген итеп,
Гел ҡарап йөрөй үргә.
Йә, күркә, бик маһайма,
Элмә ҡатаңды түргә.
Көсөк бәләкәй булһа ла,
Үҙ этлеген күрһәтә:
Бесәйгә ҡарап өрә лә,
Әйҙә, тауыш күтәрә.