Көйәнтәле ҡыҙ

Оҫта ҡуллы күрше бабай

Көйәнтә бүләк итте.

Сәскәле көйәнтәм мине

Шишмәгә һыуға илтте.

Ҡайтып киләм, эйәрҙеләр

Ҡыҙығып ҡыҙ-малайҙар.

Сәсрәтмәгәс һыу тамсыһын,

Апайҙар ҙа маҡтайҙар.

Сәпәкләй-сәпәкләй ҡулын

Ҡаршы сыҡҡан әсәйем.

Яулығының осо менән

Күҙен һөртә әбейем.

Күргәндәре юҡмы әллә

Көйәнтәле баланы!

Рәхмәт инде, күрше бабай,

Беләктәрем талманы.

Лиза ФӘТХУЛЛИНА.

Тәтешле районы Үрге Тәтешле 1-се урта мәктәбе уҡытыусыһы.