ЙОМАҠТАР
Просмотров 1 447
Рәдиф ТИМЕРШИН
ЙОМАҠТАР
Бал ҡортона бик оҡшаған,
Тик саҡһа, саға елле!
Шул бөжәктекеләй, тиҙәр,
Ҡыҙҙарҙың нәҙек биле.
(Һағыҙаҡ)
"Керпектәре” аҡтан да аҡ,
"Күҙе” алтындай һары,
Ул – сәскә. Быларға өҫтәп,
Шуны әйтәмен бары.
(Ромашка)
Кем ул ямғыр яуған һайын
Һөйөнә шулай?
Ул "зонтик” тотҡан берҙән-бер
Үҫемлек буғай.
(Бәшмәк)
"Атаһы” – ҡыҙған сағында,
Абау, ҡурҡыныс бик тә!
Ярай, "малайы” ҡотола
Менеп бейеккә – күккә,
Айырылып киткән ергә
Башҡаса төшмәй бер ҙә.
(Ут һәм төтөн)
Йә тәрән соҡор ҡаҙый ул,
Йә бейек өйөм өйә,
Төҙөүсөләр уны һөйә,
"Тимер бәһлеүән!” — тиә.
(Экскаватор)
Аңлатма: зонтик — ҡулсатыр
Ергә нығыраҡ бәргән һайын,
Бейегерәк һикерә.
Көсләп тултырылған һауа
Уны шулай иттерә.
(Туп)
Күрһәтмәйем йәмһеҙләп,
Күрһәтмәйем биҙәкләп,
Өй эсендә нимә бар –
Ситтән генә күҙәтәм.
Ялт итеп торам үҙем,
Һәр ваҡыт асыҡ йөҙөм,
Өлкәндәр һәм балалар
Миңә бик йыш бағалар.
(Көҙгө)
Астымы ҡыҙыл күҙен –
Туҡтала бар хәрәкәт,
Булмай ҡала һәләкәт.
Астымы һары күҙен –
Был аңлата: "Иғтибар!
Һаҡ бул! Алда хәүеф бар!”
Астымы йәшел күҙен –
Ары китергә мөмкин,
Ҡурҡыныс юҡ, юл иркен!
(Светофор)