Арба

Факиһа ТУҒЫҘБАЕВА

АРБА

Һөйрәгән бабай арба,

"Арба, — тип, — мине арба!”

Ҡарт булһа ла, ти, бабай,

Һиҙгер, ти, бик тә абай.

Арба юлда көсәнде,

Төшөп ҡалды күсәре.

Табалмаған күсәрҙе,

Тапҡан бабай күсәнде;

Кәбеҫтәнең күсәнен,

Эй көсәнеп, үсәнеп,

Ҡуйған арбаға бабай:

"Был эш, — тиеп , — бик ябай”.

Арба юлда көсәнде,

Һындырҙы ул күсәнде.

Ары ла китә алмай,

Бире лә китә алмай

Бабай тора, ти, юлда,

Тора, ти, һаман шунда.