ӨЛӨШЛӨ БӘЛЕШ

ӨЛӨШЛӨ БӘЛЕШ

Тыуған көнөмә минең

Әсәй бешергән бәлеш.

Бер кемде онотмаған,

Сығарған тигеҙ өлөш.

"Сәскәләр” менән биҙәлгән,

Уртала шәмдәр яна,

Миңә нисә йәш икәнен,

Әйтмәйем, үҙең һана.

Өс өлөш беҙгә — ҡыҙҙарға,

Икәү — атай-әсәйҙә,

Һеңлемә лә, ҡустыма ла

Берәр эләкте сәйгә.

Игеҙәктәр Айгиз, Илгиз

Икешәрҙе алғандар,

Ә дуҫтары Дамир, Ғүмәр

"Ауыҙ асып” ҡалғандар.

Аптыраманы әсәйем,

Бирҙе өлөш дуҫтарға.

Аңламаным, ҡайҙан алған

Тағы өлөш уларға?