Һуҡмаҡ ҡайҙа?

Рауил Сәхиулла улы Шамммасов Стәрлебаш районының Хәлекәй ауылында 1930 йылда тыуған. Уҡытыусы ла, журналис та, нәшерсе лә булып эшләгән. Өлкәндәр өсөн дә, балалар өсөн дә күп китаптар авторы ул. Башҡортостандың атҡаҙанған мәҙәниәт хеҙмәткәре.

Рауил олатайығыҙға, 85 йәше менән ҡотлап, ныҡлы һаулыҡ, илһам теләйек!

Рауил ШАММАС

Һуҡмаҡ ҡайҙа?

Бөгөн беҙҙең өй алдына

Ап-аҡ булып ҡар яуған.

Кисә йөрөгән таҡыр һуҡмаҡ

Әллә ҡайҙа юғалған.

Наил сыҡҡан көрәк тотоп,

Тирләп-бешеп ҡар көрәй.

Аҡбай уның тирәһендә

Ҡойроғон болғап йөрөй.

Наил һөйләнә Аҡбайға:

«Тик йөрөмә, эшлә, – ти. –

Һуҡмағыбыҙ ҡайҙа булған?

Әйҙә еҫкә, эҙлә, – ти. –

Табайыҡ та таҙартайыҡ,

Булһын әйҙә тап-таҡыр.

Оҙаҡламай шул һуҡмаҡтан

Атайым эштән ҡайтыр».