Ҡыш/Ринат Сөләймәнов

Таң менән тышҡа сыҡһам,
Ап-аҡ булған ер өҫтө.
Ҡайҙан алған ҡыш-рәссам
Шундай яғымлы төҫтө?

Ағастарҙың буйына
Мамыҡ шәлен ураған.
Ихатаның алдына
Ҡарҙан тауҙар бураған.

Тәҙрәләрҙең ситенә
Тау-ҡырҙарҙы төшөргән.
Ҡыйыҡтарҙың башына
Аҡлы-күкле төҫ өргән.

Төн буйы алһыҙ-ялһыҙ
Биҙәгән тирә-яҡты.
Тик шыршыларға ғына
Еткермәй ҡалған аҡты.

Әллә йәйҙән күренеш
Ҡалдырырға уйлаған?
Әллә шыршылар өсөн
Аҡ буяуы ҡалмаған?