ТУНМАҪ МЕНӘН ӨШӨМӘҪ

                                                                                                                      Айнар БАЙБУЛАТОВ

Туңмаҫ менән Өшөмәҫ

(Комикс)

     Барлыҡ ҡар бабайҙар ҙа төнъяҡ полюста йәшәп ята, ти. Туңмаҫ менән Өшөмәҫ ҡарҙан өй төҙөй, аҡ айыуҙарға, пингвиндарға балаларын ҡарашырға ярҙам итә.  

    Туңмаҫ Рәсүлде ныҡ һағынған, ти. Рәсүл дә дуҫы тураһында уйлап ултыра.

    Туңмаҫ Рәсүлде һағынғанлығы тураһында Өшөмәҫкә һөйләп бирә. Бергәләшеп малайҙы барып күрергә була, ти.

    Рәсүлгә электрон хат ташлайҙар, килеүҙәре тураһында иҫкәртәләр. Малай ҡыш килеүҙәрен үтенә.

    Яуапты ла көтмәй, ҙур һауа шарында Өфөгә ҡарай осалар, ти. Һауа бейеклегендә һалҡын булғас, Туңмаҫ менән Өшөмәҫ бер нәмә лә һиҙмәй. 

   Аҫҡа ҡараһалар — ни күрһендәр, Өфө тирәһендә — ағастар, йәшел үлән. Ҡар бабайҙар ныҡ аптыраған, ти. 

   Төшөүҙәре була, Туңмаҫ та Өшөмәҫ тә ҡаты тиргә бата. Ирей башлай. 

   Уларға ярҙамға дуҫтары менән бергә Рәсүл йүгерә, ти. Баҡтиһәң, ул туңдырма һатҡан апайҙан һыуытҡысын алып торған. Туңмаҫ менән Өшөмәҫ һыуытҡыс эсенә инеп ултыра, ти.

   Дуҫының уны онотмауына Туңмаҫ бик шатлана. Оҙаҡ ҡына бергәләшеп парк буйлап йөрөйҙәр. 

   Кәйеф күтәрелгәс, Туңмаҫ менән Өшөмәҫ йәһәт кенә һауа шарына ултырып, төньяҡ полюсҡа юллана. Ҡышын кире әйләнеп ҡайтырға вәғәҙә бирә.

   Дуҫтарығыҙға һәр саҡ ярҙам итегеҙ!