СЕЛӘН

Заһит МӨРСИЕВ

СЕЛӘН

Селән ниңә оҙон аяҡлы, беләһегеҙме? Барыһы ла әлеге шул йүнһеҙлектән башлана. Ҡоштар, хайуандар үҙҙәренә биләмә бүлешкәндә селән тәлмәрйен ҡыуып йөрөгән һәм һуңға ҡалған. Уға шул уңайһыҙыраҡ ерҙәр, йәғни һаҙлыҡ, ҡамышлыҡ, һай һыуҙар эләккән. 

Ярай, селән шунда йәшәй башлаған, ҡамышлыҡта оя ҡороп балалар сығарған, ләкин башҡа ваҡытта ул нишләр һуң, нисек ризыҡ табыр? Аптырауҙан ул һай һыуҙа баҫып тора икән, ә унда балыҡтар йөҙә. Шуларҙы селән тотоп ала башлаған. Һыңар аяғын күтәреп баҫып тора икән, балыҡ күренеүгә шул аяғы менән шап итеп тота ла ала, ти. Һыуҙың һай ере бар, тәрәнерәк төшө бар, балыҡты ла ҡурҡытмаҫ өсөн бейегерәк тороу кәрәк. Бына шулай һуҙыла-үрелә торғас селәндең аяҡтары ла, муйыны ла оҙонайып бөткән, ти. Томшоғо менән дә бик шәп тота ул балыҡты, ҡарағыҙ әле уның томшоғон, ниндәй шәп! 

Һыу буйында һыңар аяҡта баҫып торған селәнде күрһәгеҙ, ғәжәпләнмәгеҙ, уның йоҡлауы ла аяҡ өҫтөндә, балыҡ аулауы ла.