Ағастар туйы

Земфира Яубаҫарова

Ағастар туйы

Көҙ еткәйне, ағастар ҙа

Алтындан күлдәк кейҙе.

Ап-аҡ ҡайын һарғайҙы ла,

Оялып, башын эйҙе.

Сағыу буяуҙарын һибеп,

Ергә көҙ килә инде.

Саған япраҡтары—ялҡын,

Торғаны бер ут инде!

Ҡыҙыл миләш емештәре

Тәмләнә көҙгә генә.

Ырыуыбыҙ ағасы, тип,

Күңел һөйөнә генә!

Япраҡ яуа, япраҡ яуа,

Түшәлә балаҫ ергә.

Елдәр таҡмаҡ әйтәләр бит,

Әйләнә улар бергә.

Гүйә, ағастарҙың туйы

Көҙҙәр еткәндә генә!

Сағыу күлдәктәрен кейеп,

Бейеп йөрөйҙәр бергә.