Шәжәрә

Зөбәйҙә Исламова

ШӘЖӘРӘ

Тармаҡланып үҫкән имән

Тамыры төптә, тәрән.

Баһадирҙай олоно

Ҡатлы-ҡатлы быуыны.

Һоҡланырлыҡ шул имәндәй

Төҙөнөм ҙур шәжәрә,

Тармаҡланған ботаҡтары

Өҫкә табан йәшәрә.

Нығынған тамыр төбөндә

Теҙелде олатайҙар,

Ҡартатайҙар, бабайҙар,

Атайҙар һәм ағайҙар.

Ейәндәр-ейәнсәрҙәр,

Бүләһе-бүләсәһе —

Үҫер нәҫел ағасының

Өмөтлө киләсәге.

Нисә быуын — бер нәҫелдән

Һыйындырҙы ҡарт имән.

Ботаҡланып, тармаҡланып

Киткән туғандар икән.