Кәрлә менән Алпамыша

Баҫылды : 12-06-2017, 16:22 | Категория: Әкиәттәр / Бәпембә

Просмотров 916

"Аҡбуҙат"та баҫылған:06-2017

Рубрика:Әкиәттәр / Бәпембә

Исеме:Кәрлә менән Алпамыша

Автор:Даяна СӘЙФУЛЛИНА

Район:Өфө ҡалаһы

Ауыл:

Рәссам:Майя ҠӘЙҮМОВА

Кәрлә менән Алпамыша

(Әкиәт)

Йәшәгән, ти, ҙур кәүҙәле кеше — Алпамыша менән Иргәйел-кәрлә. Бер көн шулай Хыял тылсымсыһы уларҙы ҡунаҡҡа саҡырған. Бик ҙур булыуы арҡаһында Алпамыша өйгә инә алмаған. Ә Иргәйел инһә лә, уны бер кем күрмәгән. «Кәрлә кеүек бәләкәй булһамсы!» — тип ҡысҡырған, ти, ни эшләргә лә белмәгән Алпамыша. «Ә мин Алпамыша һымаҡ ҙур булһам икән!» — тигән кәрлә. Быны ишетеп торған Хыял тылсымсыһы уларҙың теләктәрен үтәгән дә ҡуйған, ти. Шунда уҡ Алпамыша бәләкәсәйгән, ә Иргәйел, киреһенсә, ҙурайған, ти.

Иртәгәһен йоҡоһонан уянған кәрлә-Алпамыша ашарға ултырған икән, ҡурҡышынан ҡысҡырып ебәргән, ти. Уға янындағы бөтә әйбер бик ҙур булып күренгән. Ә Иргәйел иһә, Алпамышаға әйләнгәс, өйөнә бөтөнләй инә алмай, тышта йоҡлаған. Аптырағас, Тылсымсы янына барырға сыҡҡандар. Юлда уларға төлкө менән ҡуян осраған.
Төлкө: «Сәләм, Алпамыша!» — тип өндәшкән кәрләгә, ә Ҡуян: «Һаумы, Иргәйел!» — тигән Алпамышаға. «Мин Алпамыша түгел!» «Ә мин Кәрлә түгел!» — тип ҡысҡырғандар былар. Төлкө менән Ҡуян бер-береһенә аптырашып ҡарағандар ҙа китеп барғандар. Күршеләр ҙә үҙ юлдарын дауам иткән. Хыял тылсымсыһы уларҙың теләген ишеткәс: «Ә мин кемдең теләген үтәнем һуң?» — тип һораған. «Ул теләк түгел ине!» — тип ҡысҡырып ебәргән тегеләр. Шулай итеп, Хыял тылсымсыһы үҙенең хатаһын төҙәткән. Алпамыша элеккесә ҙурайып, Иргәйел яңынан кәрләгә әйләнгән, ти. «Иң яҡшыһы — үҙ-үҙең булып ҡалыу икән!» — тигән, ти, Иргәйел, хатаһын аңлап.

Даяна СӘЙФУЛЛИНА,

М. Горький исемендәге Халыҡ-ара Дуҫлыҡ орденлы 3-сө гимназия уҡыусыһы.
Өфө ҡалаһы