Ал сәскә менән күбәләк

Йомабикә Ильясова — шағирә, журналист, дәүләт эшмәкәре. Башҡортостан Республикаһының атҡаҙанған матбуғат һәм киң мәғлүмәт, Рәсәй Федерацияһының атҡаҙанған мәҙәниәт хеҙмәткәре. БР Дәүләт Йыйылышы — Ҡоролтай Рәйесе урынбаҫары. Шағирәнең балалар өсөн әкиәттәренән ихласлыҡ, йылы хистәр бөркөлөп тора. Ғүмер байрамы менән ҡотлайбыҙ уны! 

Йәшел генә йәйҙә болонда күбәләк тыуҙы. Әйләнә-тирәһендәгематурлыҡҡа иҫе китеп ҡарап торҙо ла осоп китте. Иң тәүҙә ул алһыу ғына,хуш еҫле сәскәгә барып ҡунды.

— Эй, һин кем? Һин нәҡ минең кеүек, — тип тәтелдәне ул сәскәгә.

— Мин — сәскә, һин — күбәләк, — тине сәскә һауалы ғына.

— Ҡанаттарың да минеке кеүек алһыу, тик һинең ҡанаттарың күберәк.Ә һин ни эшләп осмайһың? — тип ныҡышты күбәләк.

— Мин оса алмайым. Ер мине ебәрмәй, — тип уфтанды сәскә.

— Рөхсәт итмәйме? — тип һораны күбәләк.

— Эйе, Ер — минең әсәйем. Унан айырылһам, мин һыуһыҙ, аҙыҡһыҙ кибепүләм.

— Ҡыҙыҡ. Ә һин миңә дуҫ булаһыңмы?

— Булам! — тип таждарын елпелдәтте сәскә.

—Күбәләк сәскәне үбеп алды.

— Ә һин а-а-анау сәскәләрҙе күрәһеңме?

— Күрәм, — тип көлдө сәскә.

— Ә а-а-анау ағастарҙы?

— Күрәм.

— Ә мине? — Күбәләк сәскә тирәләй осоп алды.

— Күрәм.

— Ә һин оса алһаң, мине ҡыуып етер инеңме?

— Етер инем.

— Ярай, мин осоп китәм. Хуш!

— Хуш! — тине сәскә моңһоу ғына.

Йомабикә ИЛЬЯСОВА

Рәссам Александр КОСТИН