ҠЫҘЫҠ УЙЫН

ҠЫҘЫҠ УЙЫН

Ҡар уйнатып тауҙан аҫҡа

Осто еңел саналар.

Ҡолап ҡалған хужалары

Ҡыуып арттан «сабалар».

Тик тоттормай «тимер аттар»,

Етеҙ еләләр түбән,

Малай-ҡыҙҙар өймәкләшеп

Шыуа, китеп мөккибән.

Тәгәрләшеп епшек ҡарға,

Төштөләр йырып көрттө.

Ә саналар, ҡар аҫтында,

Боҫоп, хужаһын көттө.

Ҡабат-ҡабат ҡабатланды,

Бик ҡыҙыҡ бит был уйын.

Тик нисек өйгә ҡайтырға?

Кейем еүеш, эй, ҡыйын...