Ҡолон

Ҡолон

Ҡолон әле аяҡланған,

Тоя тик елде генә.

Әй сайҡалып торған була,

Барып үҙ белдегенә.

Ер кендеге тоташҡанмы

Ҡолоном кендегенә.

Әйтерһең дә,

Күҙ алдында

Япраҡ бөрөһөн тиртте.

Әсәһенең бауырына

Ҡолон моронон төрттө.

Бер аҙ ғына тын алды ла

Атлап китте ҡабаттан.

Шул саҡ ҡолон иңдәренә

Ҡундымы ни ҡанаттар...

Гүйә, уның күҙ алдында

Күкрәп китте болоно.

Тып-тып баҫып,

Юртҡан була,

Юртҡан була ҡолоном.

Таянысы — тыуған ере,

Ә ел — уның юлдашы.

Ҡой(о)роғон һелккән була,

Ташлаған була башын.

Кешнәп кенә ебәрҙеме,

Алдарында болоно

Йылы бауыр аҫтарында

Бер аҙ торҙо йылынып.

Күҙ менән ҡаш араһында

Елеп үтә болонон.

Үҙе кешнәй,

Тыуғанына

Әй ҡыуана ҡолоном...

Тимер Юсопов