Атҡа мендем

Атҡа мендем/Муса Ғәли

Атай тотоп эйәр һалды –
Атҡа мендем.
Ялды тотоп, берсә ҡурҡтым,
Берсә көлдөм.
Атҡа менгәс, ҡапыл буйға
Үҫтем һымаҡ,
Күк толпарҙа күл-йылғалар
Кистем һымаҡ.
Мине һынап, атай ҡарай:
«Ҡурҡырмы был?
Тап егетсә, теҙгенде ныҡ
Тотормо был?»
Гүйә, һыбайлы булып мин
Торҙом сафта.
Малайҙарҙың күҙе шарҙай
Булды аҫта.
Ҡурҡыу ҡасты. Күҙем күргән
Яҡҡа елдем.
Күрегеҙ мине: атҡа мендем!
Атҡа мендем!
Юҡ, елмәнем, үттем генә
Байтаҡ ара.
Теҙгенде бит атай тотоп
Атлап бара.

Рәссам Азамат ҒАРИПОВ
10-2018