Әсәй икмәк бешергән
Баҫылды : 1-10-2018, 16:37 | Категория: 8 март / Минең ғаиләм
Просмотров 623
- "Аҡбуҙат"та баҫылған:10-2018
- Рубрика:8 март / Минең ғаиләм
- Исеме:Әсәй икмәк бешергән
- Автор:Муса ҒӘЛИ
- Район:
- Ауыл:
- Рәссам:Азамат Ғарипов
Әсәй икмәк бешергән
Ап-аҡ онға әүәләп,
Әсәйем ҡамыр баҫҡан.
Ҡамыр шундай ҡабарған:
Күнәк ситенән ташҡан.
Йылы, йомшаҡ ҡамырҙы
Һыйпап, ҡулына алып,
Әсәй икмәктәр ҡуя
Ҡалай һауытҡа һалып.
Мейес ҡыҙған, эҫеһе
Алыҫҡа бәреп тора.
Алда ҡуҙҙар, өйөлөп,
Йым-йым ҡыҙарып тора.
Ваҡыт еткәс, һауыттан
Туп-туп төштө икмәктәр.
Шундай түп-түңәрәктәр,
Әйтерһең, тәгәрмәстәр.
Береһе бик тә ҡабарған.
– Тау! – ти әсәйем, көлөп.
Шул тауҙы ипләп кенә
Бирҙе ул миңә телеп.
Рәссам Азамат ҒАРИПОВ
10-2018
(голосов:0)
Оҡшаш материал
{related-news}
Комментарийҙар