Һау бул, баҡса!

Артем: Сәләм, дуҫтар! Беҙ баш ҡалала йәшәһәк тә, үҙебеҙҙең туған телебеҙҙе уҡып өйрәнер өсөн башҡорт гимназияһына уҡырға барабыҙ. Һеҙҙе лә үҙебеҙ менән саҡырабыҙ!

Йәсминә: Беҙ ҙә олатай-өләсәй, атай-әсәйҙең телендә матур итеп һөйләшергә, бер-беребеҙ менән аралашырға теләйбеҙ.

Артем: Тап шулай. Самира, беләһеңме, һинең дә, минең дә әсәйебеҙ, ә Йәсминәнең атаһы ошо Фатима Мостафина исемендәге 20-се башҡорт гимназияһында бергә, бер класта уҡығандар бит.

Самира: Эйе, беҙ ҙә улар кеүек дуҫ булып, тырышып уҡырбыҙ.

Йәсминә: Үҫкәс, илебеҙгә яраҡлы шәхестәр булырға тырышырбыҙ!

Артем: Бында тағы ла малай-ҡыҙҙар бар. Һорашайыҡ әле, улар ниндәй мәктәпте һайлаған икән?

Ғабдуррахман: Барығыҙға ла сәләм! Мин дә үҙебеҙҙә, Шамонин ауылында йәшәгән таныш ҡыҙҙарҙы — Асия менән Самираны осраттым.

Асия: Мин дә һеҙҙең менән бер мәктәпкә барасаҡмын.

Самира: Әйҙәгеҙ, дуҫ булайыҡ!

Йәсминә: Онотоп китмәнегеҙме?! Бында бит тағы ла кемдәрҙер бар?

Ғабдуррахман: Үәт әй, онота яҙғанмын шул. Рәхмәт, Йәсминә! Улар минең әсәйемдең тыуған яғы — Ғафури районы Еҙем-Ҡаран урта мәктәбендә уҡыясаҡ дуҫтар! Һеҙҙе лә таныштырайым— Айвар , Арина һәм Илнара .

Артем: Ниндәй күмәк булып киттек, әй!

Ғабдуррахман: Хәҙер беҙгә тырышып уҡырға ғына ҡала!

Самира: Уҡыусы булыуыбыҙ менән ҡотлайым!

Асия: Барыбыҙға ла — уңыштар!