Саят ҠАМШЫГЕР/ҒҮМЕР ТИГӘНЕҢ

Бөгөн көнөм ҡаҙаҡ шағиры Саят Ҡамшыгерҙың шиғырҙарын башҡортсағә тәржемәләп үтте. Элекке ете тәржемәмә бөгөн тағы һәлмәк кенә дүрт шиғыр өҫтәлде. Бына шуларҙың береһе.
Саят ҠАМШЫГЕР.
ҒҮМЕР ТИГӘНЕҢ
 
Ғүмер тигәнең гүзәл дә, ҡайһы бер ҙә бик ҡырыҫ.
Алда нимә көткәнен белеп булмай, ул алыҫ.
Бәхет ҡошо өйөңдө ташлап осоп киткәнен
Һиҙмәй ҡала күбеһе, ә һин һиҙергә тырыш!
 
Ғүмер шулай, бәхетте ваҡытында күрмәйһең.
Бейек тауға үрмәләп , ҡулыңдағын үрмәйһең.
Теш-тырнаҡлап тырышып, намыҫыңды юғалтма,
Үкенерлек булмаһын, менеп баҫҡас үргә һин.
 
Ал ғүмерҙән үҙеңә тейешлеһен байлыҡтың,
Йөрәк – һинең пак көҙгөң, шуға ҡарап атлыҡ һин.
Был донъянан киткәс тә, Хоҙай ҡаршында яҡлар
Яҡшы эшең, иманың һәм хәләле ризыҡтың.
 
Әгәр һағыш һәм асыу һине баҫып аунатһа,
Яуыз йыртҡыс бүреләй тештәрен ул ыржайтһа,
Мылтығыңды ал ҡулға, йәлләмәй тарт күреген,
Маҙа бирмәҫ уйҙарҙың үлтер шулай бүреһен.
 
Ғүмер тигәнең – тотош бер ғәләмдер, йыһандыр,
Уға тылсым көстәре йомаҡтарын ҡойғандыр.
Яҡшы йәндең ғүмере таушалмаған китаптыр,
Ямандарҙың ғүмере – яҙа ҡалһаң, ялғандыр...
 
Ғүмер – бәйге, ынтылыш, уңыш өсөн ярыштыр.
Алда килгән берәүгә башҡаларҙан алҡыштыр.
Оло Абай байрамын хәтерләгеҙ, бер малай,
Ҡолап ҡалған атының теҙгенен сисеп, уҙышты!
 
Аллаһ Тәғәлә ҡөҙрәтле, сикһеҙ шәфҡәт һандығы,
Ынтыл алға, күңелдә өмөт утын яндырып.
Тик көслөләр бейеккә һала ала һуҡмағын,
Шулай ҡуша донъяның йәшәйеш ҡанундары!

Ҡаҙаҡсанан башҡортсаға Тамара ИСКӘНДӘРИӘ тәржемә итте.

30.11.2020