Ҡар бөртөгө һәм Йыланбикә

Ул күктә тыуҙы. Һыу тамсыһы ине, уны кемдеңдер һалҡын һулышы шығырҙатып туңдырҙы. Ҡояш нуры, уны күреү менән:
— Ҡар бөртөгө, әйҙә бергә уйнайыҡ! — тине. 
Ул — ҡар бөртөгө? Шунда уҡ һеңлекәштәрен күрҙе. Ниндәй матурҙар, ынйы һымаҡ балҡыйҙар! 

• Беҙ — ҡар бөртөктәре! — тип, шарҡылдашып, ҡулға-ҡул тотоноп бейейҙәр. 

— Ә хәҙер, әйҙәгеҙ, ергә табан осабыҙ! Унда беҙҙе балалар көтә!
Остолар, йырлаша-йырлаша остолар улар. Бына ҡар бөртөгө Дамирҙың бейәләйенә ҡунды. Оҙаҡ уйнап йөрөп малайҙың ҡулы ныҡ өшөгәйне, бейәләйе боҙланып ҡатҡайны. Бейәләйен сисәйем генә тиһә… Ниндәй мөғжизә! Дамирҙың был матурлыҡҡа иҫе китте. Ә ҡар бөртөгө малайҙың шундай яғымлы, шундай ихлас күҙҙәренә баҡты. 
— Бына кем өсөн шулай талпынғанмын икән ергә! Шундай яҡшы малайҙы күрер өсөн! — тип сыңғырлатып көлөп ебәрәйем, тиһә, ҡапыл иреп юҡ булды ла ҡуйҙы ҡар бөртөгө.
Дамир күктән тағы, тағы аҡ ынйыларҙы тотто. Улар араһында әлегеһенә оҡшағаны юҡ ине.
Өйгә ҡайтҡас, әсәһенән һораны: 

• Әсәй, ә ҡар бөртөгө иреп юҡҡа сыға ла башҡа бер ҙә булмаймы ни? 

Әсәһе белә — улы гүзәллеккә хайран. 

• Ҡар бөртөктәре бер-береһен ҡабатламай, тиҙәр. Хоҙайҙың ҡөҙрәте сикһеҙ инде, — тине ул. Шунан, Дамирҙың күңелһеҙләнгәнен күреп, былай тип өҫтәне:

 — Бөтә нәмә , улым, тыуа ла, мәле еткәс, үлә. Донъя шулай ҡоролған. 
Кисен Дамир йоҡлай алмай ятты. Тәҙрәлә Ҡыш бабай төшөргән биҙәктәрҙе күҙәтте. Йымылдап торған сихри аҡ урман ине унда. Ә бынау уралып-уралып ятҡан еренән башын ҡалҡытҡаны йылан түгелме һуң? Эйе, Дамир уны ла сырамытты. Башына семәрле биҙәкле таж кейгән аҡ йылан, йылмайып, оҙон аҡ керпекле күҙҙәрен уға төбәгәйне. “Йыланбикә”, — тип уйлап та өлгөрмәне, малай йоҡлап китте. Төшөндә ул Йыланбикә менән оҙаҡ серләште. 
— Ана, бәҫ һырыған ағасты күрәһеңме? Ниндәй матур ул! Ә яҙын, ҡар иреп бөткәс, ул тағы ла, йәшәреп, күркәмләнер, — тине Йыланбикә.

• Ә ниңә донъя улай ҡоролған? — тип һораны Дамир зирәк хайуандан. 
• Йән эйәләре бер-береһенең, тәбиғәттең ҡәҙерен белһен өсөн, — тине Йыланбикә. — Етеп килгән Яңы йыл ҡотло булһын, кескәй дуҫҡайым!