Бәлә ташый, тиеп, шиғырымды

Бәлә ташый, тиеп, шиғырымды
Ҡыуған сағым булды бик йыраҡ.
Тоғро эттәй, мөлдөрәп тә ҡарап
Ҡайтып ятты, оло юл урап.

• Ҡайҙа йөрөнөң? — тим. Һағынғайным.

Ул мөлдөрәп миңә ҡараны.

•  Ауыр булыр һиңә,

Һөйләй ҡалһам
Үҙем үткән ошо араны.

• Һөйлә, һөйлә! — тимен.

Ә ул уйсан.
Башҡынайын һала ҡулыма.

•  Алдай белмәйем мин.

Тик дөрөҫөн
Һөйләп бирһәм, артҡа ҡолама.
Оло юлдан
Атлай оло хәтәр
Оло хәтер менән дау ҡороп.
Елдәр олоп торған оло юл бит
Хәтерләтә бөгөн яу ҡырын.
Бер ваҡытта ла, ти, былай ҡырҡыу
Тормағандыр көрәш ер өсөн.
Ил, тел, иман өсөн яу хаҡында
Кешеләргә еткер дөрөҫөн.

• Дөрөҫөн? — тим. —

Ләкин һәр кеше бит
Үҙенсәләп күрә дөрөҫтө.
Әҙәм балаһы бит әллә нисә
Төрлө аңлай бер үк дәресте!
Ысынбарлыҡ, туҙып, ағарынып,
Ҡабарынып ҡалҡа ҡаршымда.
Даирәһеҙ ҡалған телдәй, бағам
Еремдәге һәр бер аршынға.

•  Ысынбарлыҡ йөҙгә төрләнһә лә,

Ғәҙел әйләнә бит Әүернә.
Хаҡ юлыңда бул һин халҡың менән,
Аҡ һүҙеңде әйт һин
Дәүергә.