ТАУҒА АРТЫЛЫУ

Фуникулер осто тау үренә.
Ҡоштар һымаҡ беҙ ҙә осабыҙ.
Мәңгелектең серен һаҡлап торған
Ап-аҡ ҡаяларҙы ҡосабыҙ.
Үргә,
Үргә!
Үргә талпынабыҙ!
Тау сәскәһе ҡала сәләмләп.
Үтә күренмәле кабинабыҙ
Яҡынайған һымаҡ ғәләмгә.
Бына бер саҡ,
Тауҙың иң үренә
Алып менгән саҡта арбалар,
Шар асылып китә күҙ алдында
Меңәр-меңәр саҡырым аралар.
Ап-аҡ болот - аяҡ аҫтарында.
Зәңгәр үркәс тауҙар теҙеме.
Йәшәйештең сере асылған мәл -
Әллә, тимен, ошо үҙеме?
Кавказ, Кавказ!
Ер һөтөнә ҡапҡас,
Гүйә, асылған да сүлмәге,
Түгелеп киткән ап-аҡ болот булып...
Монарлана тауҙар күкрәге.
Иҫкә төшә шул саҡ
Уралымда
Менгән мәлдәр тауҙар үренә.
...Ҡарауыл тауҙан нисә саҡырымдарға
Күлдәр иле шулай күренә.
Ағинәйҙәр милли кейемдәрҙә
Ҡымыҙ һоноп ихлас ҡаршылай,
Ҡурай моңо, ҡумыҙ сыңлауҙары,
Шаян уйын-көлкө - барыһы ла
Күңелемдә ҡапыл яҡтырҙылар...
Бәләкәйерәк унда түбәләр...
Ләкин Уралҡайым түбәләре
Тыуған яҡтың күген үбәләр...
Тауҙар, тауҙар!
Ниндәй серҙәр-ауҙар
Йәшерелгән һеҙҙең үрҙәрҙә?
Һуҡмаҡтары текә,
Шырлыҡтары
Кеше аяғы баҫмаҫ ерҙәрҙә...
Тормош та шул.
Өнһөҙ, аяуһыҙ ҙа...
Матурлығы - үҙе тамаша.
Оҡшаһа ла шул тауҙарға тормош,
Алға барһа ла гел дау аша -
Фуникулер менән осоп ҡына
Менмәйбеҙ шул уның үренә...
Тауҙар иле,
Көс бир төшөнөргә
Йәшәйештең арбау серенә.