ТОРАТАУ

Күк монарҙа
Тыуыр көнгә бағып,
Тигеҙ ерҙән ҡалҡып тора тау —
Замандарҙың даулы дауылынан
Йырғыланып бөткән Торатау.
Йырып сығалмаҫлыҡ күл кискәндәй,
Төшөнөргә һине тырышам.
Нимәң һинең йәнемде һуң йәнсей?
Ниҙе һинән эҙләй ҡарашым?
Ығы-зығыларҙа онотолоп,
Үҙ уйыңа батҡан ҡарт һымаҡ,
Яурын баҫып ниҙәр хәтерләйһең,
Хәтәр тарихтарың бар һымаҡ?
Һиҫкән дә һин күҙ һал тирә-йүнгә:
Быуат-быуат ниҙәр күрмәгән
Оло ағаң Шаһтау күкрәгенә
Контейнерҙар бөгөн үрмәләй.
Ҡан төйнәйҙәр һымаҡ контейнерҙар
Йөрәгемә бүрткән тамырҙан.
Шаһтау үлеменә кем ҡайғырған —
Алйып торған мин дә алйырҙан...
Контейнерҙар сымы тиҙҙән, тиҙәр,
Ҡолас ташлар һинең тарафҡа.
Шулай уҡмы иңрәп ҡалған өңдән
Ут бөркөлөр беҙҙең ҡарашҡа?!
Тау тып-тыныс,
Хатта ғәмһеҙ тора.
Тик тынысмы һуң һин, эй, шихан?
Данлы, шаулы ҡәлғә саҡтарыңды
Бар йондоҙҙар белә, бар йыһан.
Хәтәр быуаттарҙа төйәк иткән
Һине башҡорт бейе Торахан.
Кинйәкәү ҙә ауылы ҡайҙа, тиеп,
Күптәр белмәҫ хәҙер, һораһаң.
Торахандың улы Кинйәкәүҙең
Яндырылған ауылы ерҙә юҡ.
Һигеҙ саҡырым аша сәсәгән, ти,
Уның төтөнөнән Ҡыяуыҡ.
Янған ерҙә Петровское ҡалҡҡас,
Ят исемде баҙмай атарға,
Быуат-быуат ата-бабам әйтер:
«Кинйәкәүгә барам баҙарға...»
Шанлы замандарға шаһитһың һин,
Харабалай, ҡатты ул заман.
Тормош диңгеҙендә — тик ҡомартҡы,
Даны киткән һин бер уҙаман.
Шихан өнһөҙ.
Ләкин һиҙәм — миңә
Бөйөк тулҡын килеп ҡағыла:
Уҡ-һөңгөлө яуҙар шаулап торған
Быуаттарҙың заңы ағыла.
Күҙ алдына килә ҡәлғәһенән
Тирә-йүнгә баҡҡан Торахан...
Европала — храм емереү,
Беҙҙә
Харам — шихандарҙы тураһаң!
...Күк монарҙа,
Тыуыр көнгә бағып,
Тигеҙ ерҙән ҡалҡып тора тау —
Дәүерҙәрҙең даулы дауылынан
Яралары бөтмәҫ
Торатау.
1983