АҠ ЙЫЛАН/Фаҡиһа ТУҒЫҘБАЕВА

Яңы йыл байрамына мин
Йылан булып кейендем:
Ап-аҡ йылтыр кейемемә
Көлә-көлә һөйөндөм.

Хужаһы мин Яңы йылдың,
Бейенем дә бейенем.
Аптыратты дуҫтарымды
Ап-аҡ ҡына кейемем.

— Аҡ йылан да буламы ни?—
Тип һораны Илморат.
— Йыландарҙың батшаһы ул, —
Тинем мин уға, йырлап.

— Ул ҡайһы илдә йәшәй? — тип
Дуҫым тора шаҡ ҡатып
— Әкиәттә!
Кешеләргә
Килтерә бәхет, шатлыҡ.

Батша булғас бик-бик көслө:
Барлыҡ дошманын еңә.
Ул һаҡлағас, ҡояш балҡый
Кешеләрҙең өйөндә.

— Яңы йылға ҡушайыҡ беҙ
Аҡ йылан йылы, — тиеп
Сәпәкәй иткәс дуҫтарым,
Уйнайыҡ та бейенек.