Пионерка һәм ҡашҡа быҙау/ Ғабдулла Амантай

Ҡара, беҙҙең ҡашҡа быҙау,
Ҡара, ҡандай уйынсаҡ!
Һикерә йөрөп уйнар ине,
Уңайһыҙлай муйынсаҡ.

Үҫә-үҫә ҡашҡа быҙау
Ҡашҡа һыйырҡай булыр.
Ҡашҡа һыйырҡай булыр ҙа
Беҙгә күп һөт, май булыр.

Иртә менән, һәүкәшем,
Мин ҡыуырмын көтөүгә.
Елен тултырып һин ҡайтырһың,
Ҡояш байып етеүгә.

Һин ҡайтыуға торлағың
Ялт иттереп ҡуйырмын.
Алдарыңа бесән һалып,
Иҙәндәрең йыуырмын.

Кис көтөүҙән ҡайтҡанда,
Ҡаршы сығып алырмын.
Аҡ күнәгем ҡулға тотоп,
һәү-һәү итеп һауырмын.

Һин күп итеп һөт бирерһең,
Йәме, ҡашҡам, бәғерем?

1933