Байрам тамашаһы

Әсәйемдең, өләсәйҙең,

Үҙемдең дә байрамым

Календарҙа башлай матур

Һәм күңелле яҙ айын.

Атай, олатай, ҡустым да

Шым ғына бышылдаша.

Белеп торам: улар беҙгә

Әҙерләйҙәр тамаша.

Атай, быуып алъяпҡысты,

Бешерер ҙә төшөрөр.

Олатай өй-магазин-өй

Маршрутында йөрөр.

Өҫтәлгә сынаяҡ теҙеп,

Ҡустым да ярҙамлашыр.

Атайҙың ҡоймағы көйөр,

Ҡаҙандан ашы ташыр.

Үҙе, тирен һөртә-һөртә,

Ҡәнәғәт йылмаясаҡ.

Байрам ҡотлап, өсөбөҙгә

Шәп тамаша буласаҡ!