Иң матур көн/Миләүшә ҒӘЙФУЛЛИНА

Сиңерткә ҡабырғаһын ҡояшта ҡыҙҙырып ятты-ятты ла:

— Бөгөн илаһи матур көн! — тип ләззәтләнеп кирелеп ҡуйҙы.

— Мин һинең менән һис тә килешмәйем,— тине ямғыр селәүсене, ер аҫтына тәрәнерәк күмелеп.

— Нисек килешмәйһең, аңлат?! Күк йөҙөндә бер генә болот әҫәре лә куренмәй ҙәһа! Ҡояш ҡыҙҙыра! һәр кем бөгөнгө көндөң матурлығын
иҫбатлай ала!

— Юҡты һөйләмә! Бөгөн иҫ киткес насар көн! Ямғыр, йылы күләүектәрҙән дә илаһираҡ нимә булыуы мөмкин! Кит, юҡты һөйләмә!

Сиңерткә селәүсен менән килешмәй:

— Ышанмаһаң, әйҙә, ҡырмыҫҡанан һорайыҡ, — тип улар ҡарағай энәһен һөйрәтеп иләүенә ҡайтып барған ҡырмыҫҡаны туҡтаталар,

— Ҡырмыҫҡа, әйт әле, һинең ҡарауыңса, бөгөн көн ниндәй? Иҫ киткес матур, әллә насармы?..

Ҡырмыҫҡа, туҡтап тәпәйе менән маңлайындағы тир бөрсөктәрен һөртөп:

— Мин һеҙгә был турала кисен ҡояш батҡас ҡына әйтә алам, — тигән. Сиңерткә менән ямғыр Селәүсене аптырап ҡалғандар:

— Ярай, көтөрбөҙ.

Ҡояш батҡас, улар ҡырмыҫҡа иләүе янына килгәндәр ҙә:

— Йә, хөрмәтле Ҡырмыҫҡа, бир инде яуабыңды! — тигәндәр.

Ҡырмыҫҡа ҡарағай энәһенән өйөлгән бейек иләүен, ундағы тәрән төшкән юлдарҙы күрһәтеп:

— Бөгөн илаһи матур көн! Сөнки мин бик күп эш эшләнем һәм хәҙер рәхәтләнеп ял итә алам, — тигән.