ҺАНДУҒАСТЫ КЕМ ҠАРАЙ?/ Марис НӘЗИРОВ

Динарға көсөк алғас,

Даулай Дилбәр, һандуғас:

— Дамирҙа бар ташбаҡа,

Түшәктә йоҡлап ята.

Һинең дә бар, Гөлдәр, дуҫың,

Попугайың, ҡупшы ҡошоң.

Ә Замирҙа ҡарға бар,

Ҡар таптыра "ҡар” ҙа "ҡар”.

Минең генә бер кемем юҡ

Уйнап күңел күрерлек.

Алайыҡсы һандуғас,

Һайрар усыма ҡунғас…

Ҡыҙҙың ғәҙәтен белеп,

Атаһы әйтте көлөп:

— Алып ҡайтырбыҙ ярай

Тик ҡошоңдо кем ҡарай?