Мәңгелек ут яна

Шәриф БИКҠОЛ

Мәңгелек ут яна

Өс йөҙ исем ауыл уртаһында

Гранит ташҡа уйып яҙылған;

Яуҙа ауған өс йөҙ батыр даны

Мәңгелек Ут булып ҡабынған…

Өс йөҙ батыр ята

Өс йөҙ ерҙә,

Түшәктәре —

Төрлө илдәрҙә;

Исемдәре

Ҡәбер таштарында

Балҡып тора

Төрлө телдәрҙә…

Мәңгелек Ут яна —

Дан билдәһе…

Ташҡа өс йөҙ исем уйылған…

…Гранит һәйкәл

Кеше

Яңы яуҙан

Абай булһын өсөн ҡуйылған!..