ДИҢГЕҘ ҠАБЫРСАҒЫ

Тамара ИСКӘНДӘРИӘ

ДИҢГЕҘ ҠАБЫРСАҒЫ

Эй, һин, диңгеҙ ҡабырсағы,

Һырлы-ҡырлы ҡабырғаң!

Ҡолағың һаман шаулаймы

Тулҡын башҡарған йырҙан?

Анау болоттар тауышын,

Анау сәскә сыңлауын

Һинең инде нисә быуат

Онотолоп тыңлауың?

Торатауҙың, Йөрәктауҙың,

Шәкетауҙың, Ҡуштауҙың

Күкрәгендә күпме дәүер

Йәйләнең дә ҡышланың?

— Ҡайҙа һинең диңгеҙең? — тип

Һорайым ҡабырсаҡтан.

— Ике йөҙ һикһән миллион

Йылдар үтте ул саҡтан…

Бында сикһеҙ даръя ине,

Тулҡыны ине тиңһеҙ.

Һыуҙа йәшәр бар йәнлекте

Ошонда йыйҙы диңгеҙ.

Әйтте:

— Һеҙ, балаларым, — тип, —

Түгелһегеҙ мәңгелек.

Диңгеҙ кибер,

Донъя бөтмәҫ —

Берҙәм булайыҡ элек!

Бик күп дәүерҙәр үтерҙәр,

Йәнлектәр булыр башҡа.

Беҙ тауҙар булып ҡалырбыҙ —

Әйләнеп тораташҡа…

Шул саҡ бында

Төйәкләнер

Байман башҡорт балаһы.

Үҫеп сығыр ауылдары,

Әллә күпме ҡалаһы.

Изге тау, тип

Барса халыҡ

Һыйыныр беҙгә шул саҡ…

… Бына нимә бәйән итте

Шихандағы

Ҡабырсаҡ.