Күрше ҡыҙы Рәүилә

Фәрзәнә ҒӨБӘЙҘУЛЛИНА

Күрше ҡыҙы Рәүилә

Күрше ҡыҙы Рәүилә

Бик матур бейей белә,

Каникулда ауылға

Гелән ҡунаҡҡа килә.

Олатаһы ейәнсәргә

Быйманы үҙе баҫҡан,

Үҙе матур, эй ҙә йомшаҡ,

Ә төҫтәре ап-аҡтан.

Быйма кейеп Рәүилә

Көҙгө алдына килә.

Бейеп-ырғып уйнаны,

Ҡотлайым, тип, быйманы.

Аяҡтарын һелтәгәйне

Матур баҫам, тип, харап,

Быймалары һыпырылып

Осто көҙгөгә ҡарап.

Селпәрәмә килеп көҙгө

Шунда ыуылып төштө.

Олатаһы ла аһ итте:

— Балам, боҙҙоң бит эште.

Ярсыҡтарҙы йыйып ҡыҙ

Олатаһын йыуата:

— Инде бейегән сағымда

Гелән кейермен ҡата.