БАЛАЛАР ЯУАП БИРӘ

 

* * *

* * *

Ейәнсәрем Айгөлдө яҙғы ташҡын ҡарарға Ағиҙел йылғаһына алып килдем. Бик оҙаҡ ҡына йылғаға ҡарап торғас, бик иҫе китмәй генә:
— Йылға һыуҙы күп эскән, — тине Айгөл.

 

* * *
Айгөлөбөҙгә ул саҡта ун йәш тирәһе ине. Аҙыҡ-түлеккә, фатирға, коммуналь хеҙмәттәргә хаҡтар күтәрелеү сәбәпле, ғаиләләге мөлкәтте, аҡсаны һаҡсыл тотоноу тураһында һөйләшеүҙе күп тыңланы, күп күрҙе. Һуңғы һөйләшеү крандан килгән һыу хаҡында барҙы. Айгөл беҙҙе тыңлап ултырҙы ла:
— Эйе, душ аҫтында, ванна тултырып йыуынғанда һыу күп китә. Олатай, өләсәй, әйҙәгеҙ, һеҙ йыуынғанда берегеҙ ултырғысҡа баҫып, сөбөрләтеп кенә
икенсегеҙгә ҡомғандан һыу һалып тороғоҙ. Минеңсә, бер кеше йыуыныр өсөн барлығы ике-өс ҡомған һыу етә, — тине Айгөл.
— Улай буламы ни инде?— тип ғәжәпләндек беҙ.
— Ниңә булмаһын, ауылда мунса ингәндә һыуҙы тасҡа әҙләп кенә һалабыҙ, тағын самалап ҡына бер-ике ҡомған һыу менән сайынабыҙ ҙа инде, — тине Айгөл, үҙенең фекерен иҫбатлап.

 

* * *
Үзбәкстандан Башҡортостанға ҡунаҡҡа килгән биш йәшлек Хәйҙәр иртән тороуға беренсе ҡар яуҙы. Ул тәҙрәнән урамға ҡараны ла:
— Әсәй, ҡара, урам тулы мамыҡ, — тип ғәжәпләнде.

 

* * *
Төшкө ашҡа әрсеп уртаға ярылған картуф бешерелде.
— Быйыл ҡыш бик һалҡын булды, хатта баҙҙағы картуфтар ҙа өшөгән, — тинем мин. — Шәрбәтләнгән.
Ейәнем Муса, ейәнсәрем Айгөл ашай башлағас та, картуфтан шәрбәт тәме килеүен тойҙо.
— Олатай, картуфты шәкәр урынына сәйгә һалабыҙ ҙа эсәбеҙ, — тип, алты йәшлек Мусабыҙ сынаяғына береһен һалып та ҡуйҙы.