Ҡалтай менән Балтай мәрәкәләре

Баҫылды : 1-07-2017, 18:44 | Категория: Авторҙар / Йәй / Минең ғаиләм

Просмотров 670

"Аҡбуҙат"та баҫылған:07-2017

Рубрика:Авторҙар / Йәй / Минең ғаиләм

Исеме:Ҡалтай менән Балтай мәрәкәләре

Автор:Әсхәл ӘХМӘТ-ХУЖА

Район:

Ауыл:

Рәссам:Сулпан Билалова

Әсхәл ӘХМӘТ-ХУЖА

Ҡалтай менән Балтай мәрәкәләре

Буйы етмәй

— Күлдәгеңде йыуҙым бына,
Бар, ҡояшҡа эл, улым!
... Күлдәк тотоп Балтай инә:

— Ҡояшҡа етмәй буйым!

Балтай әсәһенә һөйләй
— Алмала витамин күп, тип
Әйткәйнең...
Тәҡәт ҡалманы:
Турап сыҡтым,
Ҡарап сыҡтым
Тулы бер табаҡ алманы —
Исмаһам, һыңар бөртөк тә
Витамин таба алманым!

Ҡалтай еләк йыя
— Еләкте һин ниңә улай
Әҙ йыйҙың, балам?
— Бер ыңғайҙан бәшмәк тә бит
Мин йыйып барам!
— Ә ҡайҙа һуң бәшмәктәрең,
Әйтсе, аппағым?
— Әле тапманым.

Cисергә өлгөрмәгән
Әсәһе:
— Ҡай арала ыштаныңды
Бысрата һалдың?
Балтай:
— Сыҡҡас та тайып йығылдым —
Ыштанымды сисергә лә
Өлгөрмәй ҡалдым!

Сәй эскәндә
Әсәһе:
— Артыҡ ҡайнар булды сәйең:
Өрөп эс, түгелмәһә...
Балтай:
— Һуң, сәйҙе өрөп эсергә
Мин көсөк түгел дәһә!

Ҡалтай аптырай
— Әсәй! Себеш сыға ҡайҙан?
— Йомортҡанан.
— Улай икән...
Ә унда ул ҡалай ингән?