ЙЫЛАН БАЛАҺЫ

(Парса)

Беҙҙең кәртә артында ғына — ҡуйы әрәмәлек. Әрәмәле урындар, ғәҙәттә, һаҙмат була. Ундай урынды тәлмәрйен, әрмәнде, йыландар төйәк итеүсән. Ә минең иң ҡурҡҡаным — йылан. Бәләкәйме ул, ҙурмы, ағыулымы, әллә зыянһыҙмы — барыһынан да берҙәй ҡурҡам. Шуға күрә, бесәнгә, еләккә барыр булһаҡ, оҙон ҡуңыслы итегемде кейә һалып алам. Барыбер тыныс күңел менән йөрөй алмайым — үлән араһында ҡыштырлаған, йыбырлаған һәр нәмәнән өркәк тай һымаҡ тертелдәйем. Ә инде йылан- фәлән күреп ҡалһам — бөттө баш! Йөрәгем урынынан ҡуба, ҡаса һалам ул ерҙән.

Шулай ҙа бер ваҡыт, ҡурҡыуымды онотоп, йылан күҙәтеп торорға тура килде. Әлеге әрәмәлектә булды ул хәл. Ҡустым тау үҙәненән ағып төшкән бәләкәй шишмәне, таштар менән быуып, улаҡ ҡуйып, һыу алырға сөбөрҙәк эшләп ҡуйғайны. Бер ҡара йылан балаһы донъяһын онотоп уйнай ине ана шунда. Нисек тиһегеҙме? Улаҡтан һыу менән ҡуша ағып төшөп. Һыуға тып итеп килеп төшә лә, быуылған таштар араһынан йәнтәслим кире өҫкә үрмәләй. Һәм тағы, тағы... Арымай ҙа, ялҡмай ҙа был шөғөлөнән. Ҡыуана-ҡыуана йөҙә, шөңгөй, сума. Хатта эргәһендә мин торғанды ла һиҙмәне.

Бала ҡайҙа ла бала инде — кешенеке лә, башҡа йән эйәләренеке лә. Тәүҙә барыһы ла эскерһеҙ, ғәмһеҙ булалар, ә ҙурая килә холоҡ-фиғелдәре үҙгәрә. Әлеге йылан балаһы ла зәһәр ағыулы йыланға әүерелер бер саҡ.

Зөлфиә СӘЛИХОВА

Рәссам Майя ҠӘЙҮМОВА

Билдәләнгән һүҙҙәр нимәне аңлата?