Көҙгө бәлеш

«Лас-лос» килә бит итегем,

Йәбешеп батҡаҡ ергә...

Аҡтырнаҡҡа тәмле бәлеш

Хәҙер бешереп бирәм.

Әсәй кеүек ҡамыр баҫам —

Ҡамырым — ҡара тупраҡ,

Һары, ҡыҙыл япраҡтарҙан

Эслеген һалам турап…

Әсәй ҙә бәлеш бешергән —

Уй тәмлекәс, аҡ ҡына —

Бер киҫәкте «ялп» иттергәс,

Туйҙы, буғай, Аҡтырнаҡ!

Әсәйҙеке иртә беште

Теүәл ярты сәғәткә.

Шуға минең бәлешемде

Ҡараманы тәмләп тә.

Лилиә Һаҡмар