Ямғыр тамсылары

Ямғыр тамсылары/Миңлегөл Тайсина

Ямғыр яуа “тып” та “тып”,
Ерҙе дымландырам, тип.
Тамсылар төшә ергә,
Уйнайҙар бергә-бергә.



Сығып китеп үҙәнгә,
Һикерәләр үләнгә.
Йүгерешәләр ҡыҙып,
Сәскәләргә күҙ ҡыҫып.

Тамсыҡайҙар тыпылдап,
Һыу сәсрәтеп, тупылдап,
Шаярып, мәж киләләр,
Ҡыуанышып көләләр.

Тамсыларҙың көйөнә
Бар тәбиғәт һөйөнә!..
Кинәнә ерҙең өҫтө —
Бына бит һыуҙың көсө!..

08-2018