СЕРЛЕ АЛМАЛАР

(Хикәйә)

Фирҙәүсәнең бөгөн әллә ни кәйефе төшөнкө. Әсәһенә һыйынып, мыжып ҡына торҙо. Нәфисә апай:

— Ҡыҙым, йә әле ҡурсаҡтарың менән уйнап ал. Улар һине һағынып бөткәндәрҙер инде. Бөгөн уйынсыҡтарыңды тотоп та ҡараманың, тине.

Ҡыҙсыҡ: "Юҡ-ҡ” —, тине лә карауатына барып ятты.

— Нимә булды, әллә ауырып киттеңме, тип әсә кеше бошоноп ҡыҙының маңлайын тотоп ҡараны.

— Бәй-й, башың ут кеүек ҡыҙыу. Ятып тор, бәпесем. Хәҙер ҡурай еләге менән сәй эсерермен, тип өтәләнде әсә кеше.

Өс көн шулай ҡаты ғына ауырығандан һуң, Фирҙәүсә беренсе тапҡыр тороп ултырҙы.

—Әсәй-й асыҡты-ым.

Ҡыҙының тауышын ишетеп Нәфисә апай ҙа йәнләнеп китте.

— Хәҙер, хәҙер, күгәрсенем. Минең бәләкәсем асыҡҡан икән, хәҙер аҡыллым, — тип һөйләнә-һөйләнә йүгергеләне.

Тамағына ашап алғас ҡыҙсыҡ ҡурсаҡтарын да һорап алды. Уларҙы үҙенсә дауаланы. Фирҙәүсәнең хәлен белергә дуҫтары ла килгән. Ҡулдарына төрлө-төрлө алмалар тотҡандар.

— Әйҙүк, түрҙән уҙығыҙ, балалар! Ниндәй хуш еҫле алмалар! —— Ҡайҙа үҫә бындай һутлы тәмлекәстәр, — тип ҡаршыланы Нәфисә апай балаларҙы.

— Алма баҡсаһында! — тине күпте белгән Динислам.

— Унда бик күп төр алмағастар үҫә, емештәре лә төрлө төҫтә ,— тине Ҡәҙерйә.

— Беҙҙең серле алмаларҙы ашап Фирҙәүсә тиҙерәк һауыҡҡһын — тип һүҙҙе дауам итте Динислам.

— Эйе, шунан бергә уйнарбыҙ, уның файҙалы витаминдары ла күп, — тип һүҙҙе йөпләп ҡуйҙы Ҡәҙерйә.

— Ә һеҙ алмағастарҙың атамаларын беләһегеҙме? — тип һораны Нәфисә апай уларҙан.

Балалар бер-береһенә ҡарап "Башкирская красавица”... тинеләр ҙә, башҡаларын онотҡанбыҙ, — тип туҡтап ҡалдылар.

Балалар! Бәлки һеҙ уларға ярҙам итерһегеҙ? Башҡортостанда ниндәй төр алмағастар үҫә? Алмалары ҡасан өлгөрә?