МАГНИТ БӘЛӘҺЕ

Гүзәл ҒӘЛИЕВА

МАГНИТ БӘЛӘҺЕ

Магнит таптым, магнит таптым!

Үәт ҡыҙыҡҡа килеп ҡаптым!

Ҡармаҡ осона бәйләнем,

Тимер балыҡ ҡаптырҙым.

Сөй-ҡаҙауҙы вагон итеп

"Тепловоз”дан тарттырҙым.

"Келт-келт”, "келт-келт” йөрөп ята

Өҫтәлдә ҡул сәғәте.

(Тағы онотоп ҡалдырған —

Әсәйемдең ғәҙәте).

Зыңҡ итеп килеп йәбеште,

Яҡынайтҡас магнитты,

Тәҙрәнән төшкән ҡояшта

Быялаһын ялт итте.

Бәй, сәғәттең "келт-келт” иткән

Тауышы юҡ түгелме?

Ҡыҙыҡ бөттө. Сәғәт китте.

Түгел хәҙер күңелле…

Был магнитты ҡайҙан таптым!

Бәлә булды үҙемә.

Нисек кенә күренәйем

Әсәйемдең күҙенә?

Бесәй яуап бирмәҫ инде

Минең боҙғаным өсөн,

Ҡыйын булһа ла, әсәйгә

Әйтәм инде дөрөҫөн.