Иң өлгөрҙөр

Эйе, ул Иҫке Сибай урта мәктәбенең әүҙем һәм һәләтле уҡыусылары. Шау-гөр килеп торған мәктәпте Сәлих Мөхөтдин улы Рафиҡов етәкләй.

Уҡыу йортондағы бер сара ла 3 "а” класы уҡыусыларынан башҡа үтмәй. Улар отҡор ҙа, шаян да, аҡыллы ла. "Аҡбуҙат" журналының тоғро дуҫтары.

Класс етәкселәре Әҡлимә Зәйнулла ҡыҙы Утарбаева балаларҙы төрлө фәндәрҙән уҡыта, һүрәт төшөрөргә, шиғырҙар яҙырға өйрәтә.

Уҡыусыларҙың иң әүҙемдәре - Нәркәс Ишмырҙина район кимәлендә үткән "Һаумы, һаумы әкиәт", "Урал батыр" эпосын яттан һөйләүселәр бәйгеһендә призлы урындар яуланы. Айтуған Сибаев фәнни - тикшеренеү эше буйынса, балар араһындағы "Портфолио" конкурсында еңеүсе булды. Аделина Уралбаева менән Нәркәс Баймөхәмәтова һүрәт төшөрөргә шәп. Төрлө конкурстарҙа тик призлы урындар ғына яулайҙар.

Спорт буйынса ла ҡалышмайҙар. Физкультура уҡытыусыһы Фәнис Фәрит улы Яҡупов менән бергә футбол, пионербол уйнайҙар.

"Бындай тырыш уҡыусылар илебеҙҙең киләсәге булыр!” – тип ғорурлана Әҡлимә Зәйнулла ҡыҙы.