СЕНТЯБРЬ ЕТТЕ

Кәтибә КИНЙӘБУЛАТОВА

СЕНТЯБРЬ ЕТТЕ

Мәктәптәр ишеген асҡан

Сентябрь етте.

Аҙмы уны шат балалар

Ашҡынып көттө.

Лилиәгә лә ете тулды,

Уҡырға бара.

Урамға сыҡҡас та бер аҙ

Аптырап ҡала.

Ниндәй күп икәнбеҙ, ти ул

Йылмая үҙе

Ашыға-ашыға атлай

Эй ғорур йөҙө.

Елберҙәй таңғы елдәрҙә

Бөҙрә сәстәре,

Кеше үҫкән һайын, уның

Үҫә эштәре.

Тиҙҙән китап, дәфтәр менән

Сумка туласаҡ.

Ниндәй шәп эш:

Үҙе уҡып,

Үҙе яҙасаҡ!