МИН БАШҠОРТ

Тик башҡортса өйҙә һөйләшәбеҙ,

Әсәйем дә, беҙ ҙә — балалар.

Беҙҙең атай шундай тәртип ҡуйҙы,

Йәшәһәк тә бик ҙур ҡалала.

Иртән торғас: "Атай, әсәй!”, — тиеп

Сәләмләйбеҙ, теләп теләктәр.

Күршеләргә «Һаумыһығыҙ!” — тибеҙ,

«Рәхмәт!”, — тибеҙ, алһаҡ бүләктәр.

Башҡорт китаптары кәштә тулы,

Башҡортса күп гәзит-журналдар,

Олатайым беҙгә килгәнендә

Тик башҡортса һуҙа йыр-моңдар.

"Салауаттың беҙ , — ти, — тоҡомдары,

Беҙ — башҡорт!”, — ти минең атайым.

Башҡорт булғаныма күкрәк киреп,

Башым сөйөп, ғорур атлайым!

Наилә ХӘМБӘЛИЕВА