ХОҠУҠ НИМӘ УЛ?

 — Олатай, нимә була ул хоҡуҡ ? – тип һораны Фәрит.

— Кеше яҡты донъяға йәшәр өсөн тыуа, ә уның өсөн кәрәкле шарттар кәрәк. Бына һин баҡсаға йөрөп тәрбиәләнәһең, унан мәктәптә белем алаһың, беҙ һине йылы өйҙә йәшәтергә тейешбеҙ – былар барыһы ла һинең хоҡуғың, – тип аңлатты олатай.

Уларҙың һөйләшкәнен ситтә генә ятҡан Бесәй ҙә тыңлап, мыйығына урап ҡуйҙы. «Инде күпме йылдар йәшәп, «хоҡуҡ»тың нимә икәнен дә белмәгәнмен бит!» — тип уйланы ул.

Икенсе көндө олатай менән өләсәй — баҙарҙан, Фәрит баҡсанан ҡайтҡас, шаҡ ҡаттылар ҙа ҡуйҙылар. Өй тулы мал-тыуар. Һыйыр — мейес башында,

ә ат, кәзә, һарыҡ диванға ятып телевизор ҡарай. Әтәс тауыҡтары менән түбәләге люстраға менеп ҡунғандар. Эт урындыҡтағы мендәрҙә ята.

— Кем һеҙҙе өйгә саҡырҙы? – тип һораны Фәрит йорт хайуандарынан.

— Мин. Минең генә түгел, уларҙың да йылыла йәшәргә хоҡуғы бар, – тине Бесәй.

Йомаҡтар:

Дүрттер аяғы,

Ҡайсылыр ҡолағы,

Таштан ҡаты тояғы.   (ат)

Йәй ҙә, ҡыш та бер тун кейеп йөрөй.    (һарыҡ)

Кеше түгел — һаҡаллы.    (кәзә)

Юнир САЛАУАТОВ

Рәссам Азамат ҒАРИПОВ