Эт - эткә, эт - ҡойроҡҡа

Баҫылды : 30-01-2018, 12:24 | Категория: Тылсымлы һандыҡ / Әкиәттәр

Просмотров 1 010

"Аҡбуҙат"та баҫылған:01-2018

Рубрика:Тылсымлы һандыҡ / Әкиәттәр

Исеме:Эт - эткә, эт - ҡойроҡҡа

Автор:Фәйрүзә ФӘТҠУЛЛИНА

Район:

Ауыл:

Рәссам:Майя ЗЫЯИ

Эт - эткә, эт - ҡойроҡҡа

(Әкиәт)

Ҡарағолаҡ дуҫы Аҡбайға бер көндө «Ҡарағолаҡ мәктәптә һабаҡ бирә» тигән иғлан яҙып элергә ҡушҡан. Ә Аҡбай был эште танышы һайыҫҡанға тапшырған.

Һүҙҙе дөрөҫ ишетмәгән һайыҫҡан: «Ҡарағолаҡ иртәгә йәнлектәргә ҡабаҡ бирә», — тип урман буйлап хәбәр итеп сыҡҡан. Быны ишетеп ҡалған ҡуян балаһы Ҡуянбәк дуҫы Төлкөбайға йүгергән.

— Әйҙә, иртәгә мәктәпкә ҡабаҡ алырға барайыҡ! Һайыҫҡан апай әйтеп китте, — тигән.

— Яңылыш ишеткәнһеңдер, «сабаҡ» тигәндер, — тигән балыҡ яратҡан Төлкөбай.

— Мин дә барам, — тигән, ти, үтеп барған Мыраубикә.

Иртәнсәк Ҡуянбәк — тоҡ, Төлкөбай менән Мыраубикә биҙрәләрен тотоп мәктәпкә килгәндәр. Уларҙы ҡаршы алған Ҡарағолаҡ:

— Һеҙ нимә? Уҡырға тоҡ, биҙрә менән киләләрме ни? — тип аптырап киткән.

— Ә мин һеҙҙе, ҡабаҡ бирә, тип ишеттем, — тигән Ҡуянбәк.

— Ә беҙ — сабаҡ, тип, — тигәндәр Төлкөбай менән Мыраубикә.

Ҡарағолаҡ көлөп ебәргән:

— Һай, Аҡбай боҙоҡ телефон уйыны уйнатҡан бит! Мин, һабаҡ, йәғни дәрес бирәм, тип еткерергә ҡуштым, — тигән.

Шулай итеп, Ҡарағолаҡ тәүге дәресен башлап ебәргән. Һуңынан йәнлектәргә ошондай өйгә эш биргән:

«Һабаҡ» һүҙенең нисә мәғәнәһе бар?

Был һүҙҙән тағы ниндәй һүҙҙәр яһап була?