Тешләне/ Сафуан ӘЛИБАЙ

Айбулат кәнфит ярата,

Тиҙ генә ҡаба һала.

Йәшереп кенә ҡуйһаң да,

Эҙләнеп таба һала.

Бына тағы ҡайҙа шылды,

Ул тып-тын баҫып ҡына,

Моғайын, кәнфит ашайҙыр,

Мөйөшкә ҡасып ҡына.

…Көтмәгәндә ни булды һуң? —

Килеп сыҡты сырылдап,

Бармағын күрһәтә үҙе,

Бер сәбәпһеҙ зар илап.

— Ниңә шулай аҡыраһың,

Бармағың һуң нишләне?

— Ауырттырҙы бармағымды,

Ауыҙым, — ти, — тешләне…