ҠЫЯУЫҠ

Бер балыҡҡа оҡшаттым мин
Ауылымдың һүрәтен,
Рәхмәт һиңә, Ер юлдашы,
Уны күктән күрһәттең!
Оло урам – умыртҡаһы,
Арт урамда – ауыҙы.
Ауыл осон яңғырата
Бала-саға ауазы.
Һырт буйында, йөҙгөстәрҙәй,
Үҫкән ерек ағасы.
Ҡыяуығым, һайыҡмай тор,
Һиңә әле ағаһы,
Тыуған ерҙән ҡеүәт алып,
Көс алып тарихтарҙан...
Әүлиәле яҙмышыңа
Хаҡтар ҡуймайыҡ арзан.
Балыҡ булғас, өнһөҙ микән?
Юҡ, түгелдер ул өнһөҙ!
Шулай уҡмы ауыл бөтөр,
Ҡалыр киләсәк көнһөҙ?
Бөтөргә һин уйламай тор,
Уйламай тор бер юлға!
Йөҙ әле, йөҙ, ауыл-балыҡ,
Аҡ әле, аҡ, Аҡ йылға!

Һүрәттәрҙә:
Әүлиә зыяраты. Уҫаҡлы Морон, унан Өс Уҫаҡ исемдәренән һуң Ҡыя Уҡ (1749 ревиз яҙмаларында) тип аталған ауыл. Ишембай районы.

Бүгәс яуына тиклем үк бында, Ҡыяуыҡ йылғаһының бер ярынан икенсеһенә ҡыялатып уҡ атышыу ярыштары уҙған. Легенда буйынса, исемһеҙ йылғаны шунан һуң Ҡыя уҡ атышҡан йылға тип йөрөтә башлағандар, аҙаҡ шул атама Уҫаҡлы Морон утарына ла ҡарата әйтелә. Урыҫтар перепись үткәрергә килгәс, Ҡыяуыҡты үҙҙәренсә Кияук тип алған. Хәҙерге грамотейҙар иһә ауылды онлайн-картала Кейәүкәй тип үҙ белдектәре менән үҙгәрткән.
Эй Аллам, ошолайтып кеше башын бутап-бутап яҙыла шул ул тарих...