БАЛСЫҠ ӨЙҘӘР — ЯР БУЙЫНДА

Балсыҡ өйҙәр — яр буйында,
Ҡыяуығым тулҡын ҡаға...
Бала сағым иле бит был,
Йылдар аға.
Быуат аға...
Итәктәрҙе бөрөп ҡуйып,
Һыу буйында мәж киләбеҙ.
Балсыҡ баҫып, буялышып,
Бер-беребеҙҙән беҙ көләбеҙ.
Һәр кемдең бар үҙ мөйөшө,
Әүәләгән үҙ балсығы.
Балсыҡ ҡәҙерен белә ҡыҙҙар —
Әрәм китмәҫ ыуалсығы.
Һыулап һыйпап, ялтыратып,
Шымартҡанда ҡулдар наҙлап
Йән ингәндәй була балсыҡ,
Киткән кеүек була баҙлап.
Баҙлап торған нур-балсыҡтан
Әүәләнә яҡты бер өй.
Әйҙә, уға өмөттәр өй,
Киләсәгең бәпләп сер өй!
Эй йырлаша кескәй ҡыҙҙар, 
Тилбер ҙә һуң бармаҡтары!
Бына әҙер киң иҙәне,
Диуарының бар яҡтары.
Барыһы бар: кәштә, һике,
Радиола, йоморо өҫтәл...
Донъя көтөү — бер ғүмер бит,
Шатлыҡ өҫтәп, бәхет өҫтәп!
Эй һеҙ, ҡыҙҙар! Тормошта ла
Уңһағыҙсы яҙмыштарҙан!..
Йылдар үткән... Балсыҡ өйҙәр
Йыуылғандар инде ярҙан.
Йыуылғандар, юйылғандар
Ер йөҙөнән ул хыялдар.
Донъя инде хәҙер башҡа...
Башҡа йырҙар, башҡа ярҙар...
Ҡыяуығым алҡын аға
Башҡа ваҡыт тулҡынында.
Балҡып көтә һымаҡ унда
Балсыҡ өйҙәр яр буйында.