ТАРИХ ЮЛЫ

Тарих, тибеҙ. Ә ул тарих 
Күҙ буяуға ҡоролған.
Бер дөрөҫлөк, мең әйләнеп,
Ҡырҡ тарафҡа боролған.
Йәнәһе, килер быуындар
Тәрбиә алһын унан,
Ялғандан эҙләһен хаҡлыҡ,
Иманһыҙлыҡтан – иман.
Күрәһең дә, тарих юлы
Түгел хәҡиҡәт юлы.
Һин мәшһүрлек ҡолоһоңмо,
Әллә изгелек ҡоло,
Эй, тарих?!
Бөйөктәреңдең
Ҡайһының ҡанһыҙ ҡулы?
Күрәһең дә, тарих юлы
Түгел ғәҙеллек юлы.
Оло золом ҡылынамы,
Ҡотороп шашамы хис –
Тарихтарға баш булырға
Сиктәрҙән аша  иблис!
Юҡ, быға килешмәйем мин:
Алда – рухи ихтилал.
Тарихтағы боролмалар –
Һынауҙыр ул, ихтимал...
Боролманың батыры бар,
Боролманың – бахыры.
Ҡағыҙҙарға яҙылмаған
Тарихтарҙың ахыры!
Юҡ, асылыр Иман юлы, 
Юҡ, табылыр Рух юлы!
Йылъяҙманың төп нөсхәһен
Яҙа бит Илаһ ҡулы.