ШӘЙЕХЗАДА

Шәйехзада, һин халҡымдың
Йөрәгендәге яра.
Ул яраны уңалтырлыҡ
Табылмаҫ инде сара.
Башҡорт башы аша үткән
Ниндәйерәк хәтәрҙәр!
Шул яралар һыҙлауынан
Әрней беҙҙең хәтерҙәр.
Йәп-йәш шағир — саф егеттең
Бөйөк өмөтөн күреп,
Зәки баҡҡан киләсәккә,
Хыялға хыял үреп.
Туғанлыҡтың үр нөктәһе
Уларға булған таныш.
Ниндәй рухи күтәрелеш!
Алға ниндәй ынтылыш!
Аҡ, ҡыҙыл ямаулы тарих,
Кем халыҡты алданы?
Ҡылыстар ҙа ҡол ҡылалмаҫ
Шағир Шәйехзаданы!
Шәйехзада, һин халҡымдың
Йөрәген һаҡлар ҡалҡан.
Күрсе, күпме сағыу йондоҙ
Башҡорт күгендә ҡалҡҡан!
Вәлидиҙе яҡлап яҙған
Көйлө оран-хитабың
Быуат аша ҡурсалай бит
Башҡорт телен, китабын.
Йылдар аша бағаһың да:
“Үҫегеҙ, — тиһең һин, — ҙур!”
Шәйехзада,
Һин халҡымдың
Йөрәгендә һүнмәҫ нур.