МЫСЫР

Иң бөйөк бер фәндәй, беҙ өйрәндек
Дәрестәрҙә Мысыр тарихын.
Юҡһа, кәрәк ине — иҡтисадын,
Туризмдың иҫәп-тарифын?
Бәлки, бөтмөрөрәк булыр инек
Нефть ятҡылығы өҫтөндә?
Һүҙебеҙ ҙә үтемлерәк булыр,
Булыр ине, бәлки, өҫтөн дә?
Шулай уйлай микән Рәсәй халҡы
Төркөм-төркөм һиңә осҡанда?
Тарихтан да аҡса яһай белеү,
Мысыр, һинең инде ул ҡанда.
Мысыр, Мысыр! Тарихың бит ҡыҫыр
Түгел икән — тағы болғаныш
Ялмай һине, гүйә әлмисаҡтан
Арыҫланда саба Ғилғәмеш.
Китаптарҙан баҡҡан фирғәүендәр
Һиңә терәй ине арҡаһын.
...Тарих сылбырҙарын өҙөп улар
Дөмбөрҙәтә янъял арбаһын.
Мысыр, Мысыр, ҡайһы ерең ҡысыр —
Туҡмайһың һин үҙең-үҙеңде!
Һуғыш суҡмарына әйләндең дә
Юяһың һин һуңғы түҙемде.
Кисер, Мысыр, минең үҙ еремдә
Сафлыҡ күберәк кеүек тойола:
Боронғолоҡ йәме, миһырбанлыҡ, 
Халҡым моңон һаҡлай һәр йола.
Ҡатлам-ҡатлам ятҡылыҡтар асып,
Өйрәнгәндә башҡорт тарихын,
Ҡәҙерлерәк була бара беҙгә
Тыуған илдең һәр дүрт тарафы.
Моңо менән башҡорт телкәйенең 
Асылғанда теле сабыйҙың,
Бар тәбиғәт, мең-мең йыллыҡ тарих:
“Балам!” — тиеп уны таныйҙыр.
Юҡ, кәрәкмәй, Мысыр, тарих менән
Һатыу иткән кәсеп фасылың.
Асылһын, тим, Башҡортостанымда
Әлмисаҡтан килгән асылым!