Даръя аҡсарлағы ҡунған

Даръя аҡсарлағы ҡунған
Мәғрүр тауҙың башында.
Сал тулҡындар ярҙы йыуа
Зәһәрләнеп ҡаршында.
— Минеке, бир! – ти ҙә даръя
Шанлы тауға яҫҡына.
Иҫе лә китмәй ҡаяның,
Аҡсарлаҡ та ятһына.
— Тыны менән тартып алып,
Мине тау итте әсир.
Һиңә ҡайтмайым мин,
                                 даръя,
Кәрәкмәй һинән әмер!
Тау йылмайҙы: 
— Аҡсарлағым,
Миңдә юҡ даръя йәме…
Бар, балыҡ тот,
                       донъя көт һин,
Даръяңа ҡайт,
                             бар, йәме?!